Barcelona ka humbur me rezultat 5-3 ndaj Villarrealit në kuadër të javës së 22-të në elitën e futbollit spanjoll.

Mysafirët morën avantazhin në këtë takim kur Gerard Moreno (41’) shënoi për 1-0, pas asistimit nga Alexander Sorloth.

Villarreali nuk u ndal as në pjesën e dytë, duke arritur të dyfishojë epërsinë përmes Illias Akhomach (54’) i cili shfrytëzoi gabimin fatal të Joao Cancelos për të realizuar për 2-0.

Megjithatë, blaugranasit e treguan forcën e tyre dhe arritën që të rikthejnë gjithçka në favorin e tyre, duke përmbysur rezultatin në të mirë të tyre.

Fillimisht ishte Ilkay Gundogan (60’) i cili realizoi për 2-1 pas asistimit të Robert Lewandowskit, para se tetë minuta më vonë, më saktësisht në minutën e 68-të, Pedri të shënojë për të barazuar shifrat në 2-2.

Barcelona golin e përmbysjes e gjeti me anë të Eric Bailly (71’) i cili shënoi autogol me kokë pas një rivënie këndore, për t’i dhënë tashmë epërsinë vendasve me rezultat 3-2.

Villarreali përmes një kundërsulmi të shpejtë arriti që të shënojë golin e barazimit, dhe këtë e bënë me anë të Goncalo Guedes (84’) i cili realizoi një gol të bukur për 3-3.

Barcelona në minutat shtesë fitoi një penallti pas një prekje të dyshimtë me dorë, mirëpo gjyqtari pas rishikimit në VAR, vendosi që ta anulojë vendimin e tij.

Krejt në fund të ndeshjes Villarreali befasoi të gjithë duke shënuar dy gola në minutat shtesë për të marrë fitoren.

Fillimisht Alexander Sorloth (99’) shënoi për t’i dhënë avantazhin prej 4-3 Villarrealit, ndërsa vetëm pak minuta më vonë Jose Luis Morales (101’) shënoi për t’i dhënë goditjen përfundimtare Barcelonës prej 5-3.

Pas kësaj humbje Barcelona renditet në pozitën e tretë me 44 pikë, dhjetë më pak se lideri Real Madrid dhe shtatë më pak se vendi i dytë Girona./Telegrafi/